...ուր շատերը հանում են իրենց դիմակները

«Facebook» կամ «Դիմագիրք», այսպես եմ ես թարգմանում սոցիալական այն կայքը, որ իսկական հեղաշրջում առաջացրեց ամբողջ աշխարհում: «Facebook»-ը այսօր համարվում է աշխարհի ամենաեկամտաբեր ու թանկարժեք կայքերից մեկը, որի արժեքը տատանվում է 4.5-5 մլդ. դոլլարի սահմաններում: Սոցիալական այս կայքից օգտվողների թիվը անցնում է 1,2 միլիարդից: Սրանք զուտ վիճակագրական տվյալներ են, որոնք որոշակի պատկերացում են տալիս «Facebook»-ի վերաբերյալ: Իրականում այն ինձ համար ունի մեկ այլ, առավել կարևոր նշանակություն:

«Facebook» սոցիալական կայք էջից սկսեցի օգտվել 2007 թվականից: Սկզբում դա զուտ հետաքրքրություն էր, նոր ընկերներ ձեռք բերելու, ծանոթություններ հաստատելու միջոց: Հետագայում, երբ կայքի հնարավորությունները ընդարձակվեցին, այն դարձավ իմ կյանքի մի մասնիկը, իմ դիմագիրքը: Ես հնարավորություն ստացա իմ կյանքին նայել ուրիշ աչքերով, հասկանալ ու ավելի խորությամբ տեսնել ինքս ինձ` կյանքի տարբեր իրավիճակներում: Բոլոր այն նկարները, որոնք զետեղված են իմ դիմագրքում, պատմում են իմ մասին, թեʹ ուրախության,  թեʹ տխրության և թեʹ խենթության պահերին: Բոլոր այն մտքերն ու արտահայտությունները, որ ես անցած չորս տարիների ընթացքում գրել եմ իմ էջի վրա, խոսում են իմ մասին. իմ մտքերի, իմ  հույզերի, իմ խենթության, իմ չարության, և ամենակարևորը, նրանք խոսում են իմ վախերի մասին: Ամեն անգամ, երբ ես վերընթերցում եմ դրանք, ինքս ինձ նորովի ու յուրովի եմ ճանաչում, կարողանում եմ հասկանալ իմ սխալներն ու դասեր քաղել դրանցից:

«Facebook»-ը նաև այն դիմագիրքն է, որտեղ շատ մարդիկ հանում են իրենց դիմակները…..